कफी प्रमुख पेय पदार्थहरु मध्ये एक नरम पेय पदार्थ हो। ब्यापारिक कारोबारका हिसाबले कफी बिश्वमा पेट्रोलियम पदार्थपछिको दोश्रो ठूलो परिमाणमा बिक्री बितरण हुने बस्तु पनि हो । कफी संसारको ७० भन्दा बढी देशमा उत्पादन हुने गर्दछ । बिश्वमा सबैभन्दा बढी कफी उत्पादन गर्ने देश ब्राजिल हो भने अमेरिका सबभन्दा बढी खपत गर्ने देश हो। कफीमा उत्तेजना र स्फुर्ति ल्याउने क्याफिन(caffeine)हुन्छ, यसले मानसिक र शारिरीक थकान मेट्छ, अल्छीपन र निद्रा हटाउँछ । यसमागुलियो पदार्थ (कार्बोहाइड्रेट), प्रोटिन (नाइट्रोजिनस कम्पाउण्ड), अम्ल (क्लोरोजेनिक एसिड), वास्ना (भोलाटाइल कम्पाउण्ड) र कार्बोक्सिलिक एसिड पाइन्छ । कफी एक सदाबहार बहुबर्षे नगदे बाली हो । कफीको बोट साना झाडीदेखि ठूला रुखसम्मका हुन्छन् । बानस्पतिक बर्गिकरण अनुसार कफी रुबियसी परिवारमा पर्दछ । यो प्रमुख रुपमा चार किसिमका कफीहरु उल्लेखमा आएका छन्। ती हुन्ः अराबिका रोवष्टा, लाईबेरिका र एक्सेल्सा । आर्थिक दृष्टिकोणले अराबिका र रोबस्टा बढी महत्वपूर्ण मानिएका कफी हुन्। अराबिका कफीको गुणस्तर राम्रो हुने भएकोले विश्वमा करीब ७० प्रतिशत उत्पादन यसैको हुन्छ भने बाँकी ३० प्रतिशत रोबष्टा जातको कफीको खेती गरिन्छ । लाईबेरिका कफी नगन्य मात्रामा प्रयोगमा आउँछ । नेपालमा उत्पादन गरिने सबै कफी अराबिका कफी हुन |
बिश्वमा कफी
बिश्वमा १०० भन्दा बढी मुलुकले कफी उत्पादन गर्दछन् भने यी मध्ये ५० देश जति मुख्य कफी उत्पादक देशमा गनिन्छन् । ब्राजिल बिश्वमा सबभन्दा बढी कफी उत्पादन गर्ने देश हो, भियतनाम,कोलम्बिया, इण्डोनेसिया, इथियोपिया, भारत बिश्वका प्रमुख कफी उत्पादन गर्ने देशहरु हुन्। अमेरिका सबभन्दा बढी खपत गर्ने देश हो । डेनमार्क लगायत स्केन्डेनेभियन राष्ट्रहरुमा प्रति ब्यक्ति प्रति बर्ष सबभन्दा बढी कफी खपत (९.७ के.जी/ब्यक्ति/बर्ष) भएको पाइन्छ । करिब ७५ प्रतिशत कफी बिकसित मुलुकहरु अमेरिका, जापान एवं युरोपमा खपत हुन्छ र २५ प्रतिशत कफी उत्पादक देश एवं अन्य देशमा खपत गरिन्छ । बिश्व बजारमा स्पेसियल्टी कफीको माग बढी रहेको छ तर साधारण कफीको माग र मूल्य घट्दो क्रममा छ ।
नेपालमा कफी
नेपालमा कफील गुल्मी जिल्लाक आँपचौरमा प्रवेश गरेको करिब ३७ वर्षसम्म कौतुहल बालीको रुपमा रह्यो। बि.सं २०३२ सालतिर सरकारी स्तरबाट केही बीउ भारतबाट झिकाई किसानलाई वितरण गरेपछि मात्र यसको उत्पादन ब्यवसायिक रुपमा शुरु भयो। २०४० को दशकमा कफी विकास केन्द्रको स्थापना र २०५० मा राष्ट्रिय चिया तथा कफी विकास बोर्डको स्थापना भई नियमित कार्यक्रमको रुपमा कफीलाई विभिन्न सुविधाहरुका साथ प्रवद्र्धन गरियो। यसका साथै २०४७ सालमा कृषकहरुको संगठन नेपाल कफी ब्यवसायी संघको स्थापना भएपछि कफी उत्पादनमा गति आयो । हाल कफीको खेती मध्य–पहाडका करिब ४० जिल्लामा २७,००० भन्दा बढी किसानहरुले करिब १,७६० हेक्टर क्षेत्रफलमा खेती गरेको पाइन्छ ।
नेपाली कफीे जापान, अमेरिका, कोरिया लगायत यूरोपियन देशहरुमा निर्यात भइरहेको छ । समग्रमा कुल उत्पादनको ५१ प्रतिशत कफी निर्यात भएको र ४९ प्रतिशत आन्तरिक रुपमा खपत भएको देखिन्छ । नेपाल सरकारले कफीलाई निर्यात योग्य नगदे बालीको रुपमा लिई यसको विकासको लागि पञ्चवर्षीय योजनामा राख्दै आएको छ । हाल आएर कफी उत्पादन, प्रशोधन एवं व्यापारिक कारोवारमा निजी तथा सहकारी क्षेत्र समेतको सहभागिता बृद्धि गरी देशमा उपलब्ध संम्भावनाहरुको दिगो र व्यवस्थित उपयोग गरी आय आर्जन, रोजगारीको अवसर बृद्धि एवं बैदेशिक मुद्रा आर्जन गर्ने भरपर्दो स्रोतको रुपमा कफी विकास गर्न गराउन नेपाल सरकारले राष्ट्रिय कफी नीति २०६० स्वीकृत गरी लागु गरेको छ ।